ڪتاب جو نالو | ٻليءَ جي نسل جا جانور |
---|---|
ليکڪ | خير محمد لغاري |
ڇپائيندڙ | سنڌي ٻوليءَ جو بااختيار ادارو |
ISBN | 969-8194-08-8 |
قيمت | 150 روپيا |
ڪتاب ڊائونلوڊ ڪريو | PDF E-Pub |
انگ اکر | 5 December 2017 تي اپلوڊ ڪيو ويو | 13725 ڀيرا پڙهيو ويو |
هن پالتو ٻليءَ جو اصل وطن اُتر آمريڪا جو علائقو ’ميني‘ (Maine) آهي، هي ميني علائقي جي ٻن مختلف نسلن جي ٻلين جو خار آهي. هن ٻليءَ ۾ ’رَڪُون‘ Racoon (نور جهڙي ڪئناڊائي جانور) جون گهڻيون عادتون موجود آهن، جنهن ڪري کيس ’ميني ڪُون‘ Maine coon سڏيو وڃي ٿو. هي دنيا جي وڏي ۾ وڏي پالتو ٻلي آهي. حيوانيات جي ماهرن جو خيال آهي ته ريگڊال ۽ ميني ڪون دنيا جون وڏي ۾ وڏيون پالتو ٻليون آهن، پر ميني ڪون ريگڊال کان به وڏي ٿئي ٿي، قدبت ۾ ميني ڪون گهريلو ٻليءَ کان لڳ ڀڳ ٽيڻي ۽ چؤڻي ٿيندي آهي. هي وڏي ٻُر(longhair)واري ٻلي آهي، پر يورپ ۾ نسل رانيءَ ذريعي هن جو هڪ اهڙو قسم به تيار ڪيو ويو آهي، جنهن جي جسم تي ننڍي ٻُر آهي. هن ٻليءَ جا ڪيترائي رنگ ٿين ٿا، جن ۾ نيرو، هيڊو بادامي، هيڊو واڱڻائي، بوسڪي، ڀورو، ڪارو، سونهري ۽ ادرڪي شامل آهن.
هن ٻليءَ جي مٿي کان پولهه تائين سراسري ڊيگهه تقريباً چار فوٽ ۽ وزن 10 کان 12 ڪلو گرام ٿيندو آهي.
ميني ڪون هوشيار ۽ پيار ڪندڙ ٻلي آهي. هي ماڻهن توڙي ٻين پالتو جانورن سان دوستاڻو ۽ پنهنجائپ وارو سڀاءُ رکي ٿي، جنهن ڪري کيس گهڻو پسند ڪيو وڃي ٿو. طبيعت جي لحاظ کان ماٺيڻي ۽ چست آهي، انڪري هر ڪم ۾ ڦڙت هوندي آهي. ماٺيڻي طبيعت، چستي ۽ جسم تي پشمي ٻُر سبب کيس وڏي چاهه سان پاليو وڃي ٿو.
ميني ڪون ٻلي هڪ پيٽ تي 3 کان 5 ٻچا ڄڻي ٿي ۽ سندس سراسري عمر 12 سال ٿيندي آهي.