| ڪتاب جو نالو | ٻليءَ جي نسل جا جانور |
|---|---|
| ليکڪ | خير محمد لغاري |
| ڇپائيندڙ | سنڌي ٻوليءَ جو بااختيار ادارو |
| ISBN | 969-8194-08-8 |
| قيمت | 150 روپيا |
| ڪتاب ڊائونلوڊ ڪريو | PDF E-Pub |
| انگ اکر | 5 December 2017 تي اپلوڊ ڪيو ويو | 13660 ڀيرا پڙهيو ويو |
روسي نيري ٻلي ننڍي ٻُر (Shorthair) وارين ٻلين جي هڪ جنس آهي ۽ سندس اصل وطن روس جي هڪ رياست ’آرچينجل‘ Archangels)آهي. هن رياستي سڃاڻپ جي حوالي سان کيس ’آرچينجل‘ Archangel پڻ سڏيو ويندو آهي ۽ رنگ جي لحاظ کان وري کيس ’نيري چاندي رنگي‘ (Blue/silver)چيو ويندو آهي. هن ٻليءَ جا ٿورا رنگ ٿين ٿا، جن مان نيرو، اڇو، سليٽي ۽ هيڊو بادامي گهڻا مشهور آهن. هن ٻليءَ جا ڪن وڏا ۽ اکيون گول هونديون آهن. مٿي کان پولهه تائين سندس سراسري ڊيگهه ٻه فوٽ ۽ وزن 4 کان 5 ڪلو گرام ٿيندو آهي. هن ٻليءَ جو جسم ڊگهو ۽ سڊول ٿئي جنهن تي گهاٽي ۽ وڏي ٻُر ٿيندي آهي، جيڪا کيس روس ۾ پوندڙ سخت سيءَ کان بچائي ٿي.
هي هوشيار ۽ گهڻي راند کيڏڻ واري ٻلي آهي. جنهن ڪري کيس گهڻو پسند ڪيو وڃي ٿو. هن ٻليءَ کي آسانيءَ سان تربيت پڻ ڏيئي سگهجي ٿي. ماڻهوءَ سان گڏ گهمڻ ڦرڻ هن ٻليءَ کي گهڻو وڻندو آهي ، پر ڌارين ماڻهن کان ٽهي ٿي. جيئن ته هي روسي ٻلي آهي، پر ٻين ٻلين وانگر هي ٻلي پڻ پهرين روس مان برطانيا آندي وئي، جتان پوءِ آمريڪا جو سفر طئي ڪيائين. روسي نيري ماٺيڻي ۽ خوبصورت ٻلي آهي، جنهن ڪري ڪيترن ئي ملڪن ۾ ماڻهو کيس ڏاڍي چاهه ۽ شوق سان پالين ٿا.
