ڪتاب جو نالو | ٻليءَ جي نسل جا جانور |
---|---|
ليکڪ | خير محمد لغاري |
ڇپائيندڙ | سنڌي ٻوليءَ جو بااختيار ادارو |
ISBN | 969-8194-08-8 |
قيمت | 150 روپيا |
ڪتاب ڊائونلوڊ ڪريو | PDF E-Pub |
انگ اکر | 5 December 2017 تي اپلوڊ ڪيو ويو | 13717 ڀيرا پڙهيو ويو |
هي ڏکڻ اوڀر ايشيا جي هڪ پالتو ٻلي آهي ۽ سندس اصل وطن برما ۽ ٿائلينڊ آهن، پر اڄڪلهه يورپ ۽ آمريڪا ۾ پڻ گهڻي شوق سان پالي وڃي ٿي. هن ٻليءَ کي برمي ٻوليءَ ۾ ”سڀا لهاليڪ“ (Subah-lha-lak)سڏيو وڃي ٿو، جنهن جي معنيٰ آهي ”سهڻي ۽ ڀاڳوند“. برمي ٻلي حيرت جي حد تائين سهڻي ۽ ڪشش واري آهي ، جنهن ڪري کيس گهڻو پسند ڪيو وڃي ٿو. هي شارٿيئر (Shorthair) گروپ وارين ٻلين جي هڪ جنس آهي ۽ سندس اصلي رنگ بادامي آهي، پر هاڻ نسل رانيءَ ذريعي هن جا ڪيترائي رنگ پيدا ڪيا ويا آهن، جن ۾ ڪارو، نيرو، هيڊو واڱڻائي، بوسڪي ۽ خاڪي شامل آهن،پر تڏهن به سندس مشهور رنگ بادامي ئي آهي.
برمي ٻليءَ جي مٿي کان پولهه تائين سراسري ڊيگهه ٻه فوٽ ۽ وزن 4 کان 5 ڪلو گرام ٿيندو آهي.
برمي ٻلي پنهنجي مزاج ۾ بيحد ڦڙت ۽ کيڏڻ واري ٻلي آهي، تنهنڪري ٺينگ ٽپا ڏيڻ ۽ رونشو ڪرڻ کيس گهڻو وڻندو آهي. هي ٻلي جاکوڙي، هوشيار ۽ اڻ ورچ آهي ۽ هميشه پنهنجي آس پاس جي ماحول ۾ ڪجهه نه ڪجهه ڳوليندي رهندي آهي، منجهس ميائون ميائون ڪرڻ جي عادت به ٻين ٻلين جي ڀيٽ ۾ ڪجهه سَرس آهي. هي مالڪ کي پوڄڻ جي حد تائين چاهيندي آهي. ۽ گهر ڀاتين سان گهڻو پيار ڪري ٿي. انهن عادتن ڪري هر وقت ماڻهن وچ ۾ رهڻ کيس گهڻو وڻندو آهي. برمي ٻلي هڪ پيٽ تي 3 کان 5ٻچا ڄڻي ٿي ۽ سراسري طور 12 سال حياتي ماڻي ٿي.