| ڪتاب جو نالو | ٻليءَ جي نسل جا جانور |
|---|---|
| ليکڪ | خير محمد لغاري |
| ڇپائيندڙ | سنڌي ٻوليءَ جو بااختيار ادارو |
| ISBN | 969-8194-08-8 |
| قيمت | 150 روپيا |
| ڪتاب ڊائونلوڊ ڪريو | PDF E-Pub |
| انگ اکر | 5 December 2017 تي اپلوڊ ڪيو ويو | 13696 ڀيرا پڙهيو ويو |
برميلا لانگهير (Longhair)گروپ وارين ٻلين جي هڪ جنس آهي، جيڪا پهريون ڀيرو 1981ع ۾ ’برمي‘ (Burmese) ۽’ايراني‘ (Persian) جي ميلاپ سان اتفاقي طرح پيدا ٿي. هي جنس هٿرادو طريقي سان پهرين برطانيا ۾ پيدا ڪئي وئي، اڄڪلهه آسٽريليا ۽ ڪئناڊا ۾ پڻ سندس ٻچا ڪيا وڃن ٿا. هن ٻليءَ کي ’آسٽريليائي ٽفيني‘(Australian tiffany) پڻ سڏجي ٿو. رنگ روپ، اکين، ٻُر توڙي عادتن جي لحاظ کان هي ٻلي ڏاڍي خوبصورت آهي. قدبت ۾ وچولي جسم واري ٻلي آهي. سندس جسم گول، پويون ٽنگون وڏيون ۽ اڳيون ٿوريون ننڍيون ٿينديون آهن. برميلا جون اکيون وڏيون ۽ سهڻيون ٿين، ڪن ننڍا ۽ چوٽي دار جڏهن ته نڪ جي چوٽي ڳاڙهي ۽ مٿي تي چٽڪمري (Tabby) وانگر انگريزي اکر M جهڙو نشان ٿيندو آهي. هن ٻليءَ جي پڇ تي گهڻي ٻُر ٿئي ۽ اکيون سايون يا وري سونهري ٿين. اکين جو رنگ جسم جي رنگ جهڙو ٿيندو آهي. برميلا جا ڪيترائي رنگ ٿين ٿا، جهڙوڪ: نيرو، هيڊو واڱڻائي، ڪارو، چاڪليٽي ۽ ڀورو وغيره، پر اڇو رنگ سڀني کان سهڻو ٿئي ٿو ۽ وڌيڪ پسند ڪيو ويندو آهي.
برميلا ’برمي‘ Burmese ۽ ’ايراني‘ Persian ٻلين جو خار آهي، جنهنڪري منجهس ٻنهي ٻلين واريون خاصيتون موجود آهن. هي وفادار ۽ سماجي وهنوار ۾ دوست مزاج ٻلي آهي. جنهن ڪري گهر ڀاتين ۽ مالڪ سان ڏاڍو پيار ڪري ٿي ۽ جڏهن ڪو ڀاتي گهر ۾ گهڙندو آهي ته ڊوڙي وڃي سندس آڌر ڀاءُ ڪندي آهي. ٻارڙن سان راند روند ڪرڻ پڻ هن ٻليءَ کي ڏاڍو وڻندو آهي، ۽ ٻار به ساڻس راند ڪندي خوش ٿيندا آهن. برميلا کي رانديڪا ڏاڍا وڻندا آهن، انڪري هميشه پئي ساڻن کيڏندي آهي. هي ٻلي سهڻي شڪل ۽ سٺين عادتن سبب ملڪان ملڪ مشهور آهي.
