| ڪتاب جو نالو | اسيمبليءَ جو راڳ |
|---|---|
| ليکڪ | منوج ڪمار |
| سنڌيڪار / ترتيب | غلام مصطفيٰ سولنگي |
| ڇپائيندڙ | سنڌي ٻوليءَ جو بااختيار ادارو |
| ISBN | 978-969-625-077-7 |
| ڪتاب ڊائونلوڊ ڪريو | PDF E-Pub |
| انگ اکر | 20 February 2017 تي اپلوڊ ڪيو ويو | 461977 ڀيرا پڙهيو ويو |
ڇوڪرَ توکي رنگ ڏيکاريان،
رنگ سڃاڻڻ توکي سيکاريان.
ڏس هن رنگ جو نالو ڇاهي،
رنگ اهو تان ڳاڙهو آهي.
ڳاڙهي رنگ جي صورت اهڙي،
چهنب چَتُونءُ جي آهي جهڙي.
ٻيو جو هيءُ تون رنگ ڏسين ٿو،
زردو جهڙو هيڊ پسين ٿو.
تَنهن جو نالو آهي پِيلو،
ٽيون هيءَ آسماني يا نيلو.
نير ۽ اُڀ جو رنگ اهو ٿيو،
نالو تنهن تي تڏهن اهو پيو.
اصلي رنگ اهي ٿيا ٽيئي،
جُڙن انهن مان ٻيا سيئي.
ڳاڙهي ۾ جي پيلو پوندو،
رنگ نارنگي تنهن مان ٺهندو.
ڳاڙهي ۾ جي نيرو گڏبو،
رنگ واڱڻائي سوئي سڏبو.
نيري ۾ جي پيلو وجهبو،
سَائو رنگ انهيءَ کي چئبو.
ڪيئن نه ملائي رنگ ڪڍيائين،
ٽن منجهان ٻيا ٽي ڪيائين.
