سنڌي ورچوئل لائبرري

سنڌي لئنگئيج اٿارٽيءَ پاران ڊاڪٽر الطاف جوکيي جو هيءَ ڪتاب ’عربي- سنڌي آئيويٽا جو اڀياس‘ ڇپائيندي، مون کي ان ڪري به نهايت خوشي  ٿي رهي، جو  هي ڪتاب، سنڌي لئنگئيج اٿارٽيءَ جي عين مقصدن ۽ دائره ڪار تي پورو لهي ٿو. ڊاڪٽر الطاف جوکيي، پنهنجي هن ڪتاب ۾ سنڌي ٻوليءَ جي ’عربي-سنڌي‘ آئيويٽا جو تاريخي، ارتقائي، سماجي ۽ علمي جائزو ورتو آهي. هن خالص تحقيقي بنيادن تي عربي- سنڌي آئيويٽا بابت پنهنجي راين ۽ تجويزن کان پڻ آگاهه ڪيو آهي ۽ ڪيترائي اهڙا نوان نُڪتا پيش ڪيا آهن، جن تي وڌيڪ تحقيق ڪرڻ سان، هن موضوع بابت نوان ۽ اڻ ڇهيل پاسا دريافت ڪري سگهجن ٿا.

هيءَ ڪتاب سنڌي لئنگئيج اٿارٽيءَ جي پبليڪيشن ڪميٽي منظور ڪيو ۽ اهو پڻ فيصلو ڪيو ته ڪتاب تي ايڊيٽنگ ۽ نظرثاني سائين محمد ابراهيم جويو ڪري. جويي صاحب مهرباني ڪري هن ڪتاب جي ايڊٽنگ ۽ نظرثاني ڪئي ۽ ڪن تجويزن کي ڪڍي ڇڏڻ جو مشورو ڏنو. جويي صاحب جي مشوري مطابق ڊاڪٽر الطاف جوکيي ٻيهر مسودو تيار ڪري ڏنو، جيڪو ڇپائي اوهان آڏو پيش ڪجي ٿو.

اسان کي اميد آهي ته ’عربي سنڌي آئيويٽا‘ جي تحقيق اڀياس تي ٻڌل هي ڪتاب، سنڌي ٻولي ۽ ادب جي شاگردن توڙي ٻوليءَ ۽ الفابيٽ تي تحقيق ڪندڙن لاءِ وڏو مددگار ثابت ٿيندو.